ຕາມການລາຍງານຂອງທ່ານ ສົມພິນ ອິນທະວົງ ຫົວໜ້າກອງກວດກາພາສີ ປະຈຳນະຄອນຫຼວງວຽງຈັນ ໃຫ້ຮູ້ໃນວັນທີ 20 ມິຖຸນາ 2016 ວ່າ: ເຈົ້າໜ້າທີ່ກອງກວດກາພາສີນະຄອນຫຼວງ ໄດ້ເອົາໃຈໃສ່ເຄື່ອນໄຫວປະຕິບັດໜ້າທີ່ວຽກງານວິຊາສະເພາະຂອງຕົນເປັນຢ່າງດີ ໂດຍສາມາດສະກັດກັ້ນການລັກລອບໜີພາສີລຽບຊາຍແດນ ແລະ ຕິດຕາມກວດກາການເຄື່ອນຍ້າຍສິນຄ້າ ພາຍໃນຂອບເຂດຄວາມຮັບຜິດຊອບຕາມກົດໝາຍ ແລະ ລະບຽບການກຳນົດ ເຊິ່ງສາມາດຕິດຕາມກວດກາພົບເຫັນ ແລະ ກັກສິນຄ້າເຄື່ອງອຸປະໂພກ-ບໍລິໂພກທີ່ຜູ້ປະກອບການພະຍາຍາມລັກລອບໜີພາສີ (ນອກດ່ານ) ໄດ້ຈຳນວນໜຶ່ງຄື: ໃນລະຫວ່າງວັນທີ 17-18 ມິຖຸນາ 2016 ໄດ້ກັກສິນຄ້າປະເພດເຄື່ອງໃຊ້ໄຟຟ້າ ຕູ້ເຢັນ 7,8 ຄິວ ຍີ່ຫໍ້ໄຮເອີ ແລະ ຊຳຊຸງ ຈຳນວນ 20 ໜ່ວຍ ຈັກຊັກຜ້າ LG 13 ກິໂລ ຈຳນວນ 30 ໜ່ວຍ ໂທລະພາບຍີ່ຫໍ້ໄຮເອີ 50 ນີ້ວ ແລະ ໂທລະພາບຍີ່ຫໍ້ຊຳຊຸງ 24 ນີ້ວ ຈຳນວນ 2 ໜ່ວຍ ເກີບໂບກ ຈຳນວນ 44 ແກັດ ແລະ ກັກພາຫະນະລວມມີລົດກະບະ 4 ປະຕູ MITSUBISHI ຈຳນວນ 1 ຄັນ ລົດ MAZDA ຈຳນວນ 1 ຄັນ ລົດ TOYOTA ຈຳນວນ 2 ຄັນ ແລະ ລົດຈິບ 5 ປະຕູ TOYOTA ຈຳນວນ 1 ຄັນ ເຊິ່ງລົດຈຳນວນດັ່ງກ່າວນີ້ ເມື່ອຕິດຕາມສົມທົບກັບຄົມມະນາຄົມ ເພື່ອກວດກາຕົວຈິງເຫັນວ່າໃຊ້ປ້າຍປອມ ແລະ ທະບຽນປອມ ເຊິ່ງບໍ່ມີຢູ່ໃນກົງໂຕນ.
ທ່ານ ສົມພິນ ອິນທະວົງ ໃຫ້ຮູ້ອີກວ່າ: ເມື່ອບໍ່ດົນມານີ້ເຈົ້າໜ້າທີ່ກອງກວດກາພາສີນະຄອນຫຼວງ ຍັງໄດ້ກັກຢຶດສິນຄ້າປະເພດຢາປົວສຸຂະພາບ ຈຳນວນ 19 ລາຍການ ທີ່ບໍ່ມີເອກະສານເສຍພາສີນຳເຂົ້າ ແລະ ເອກະສານຈາກພາກສ່ວນກ່ຽວຂ້ອງ ເຊິ່ງຢາຈຳນວນດັ່ງກ່າວທາງກົມອາຫານ ແລະ ຢາ ກະຊວງສາທາລະນະສຸກໄດ້ຢັ້ງຢືນວ່າ: ຢາຈຳນວນດັ່ງກ່າວບໍ່ອະນຸຍາດໃຫ້ໃຊ້ ເນື່ອງຈາກມີຄວາມສ່ຽງທາງດ້ານຄວາມປອດໄພ ຕໍ່ຜູ້ໃຊ້ຢາທີ່ບໍ່ທັນຂຶ້ນທະບຽນໃນ ສປປ ລາວ ຈຶ່ງສະເໜີໃຫ້ມີການທຳລາຍຖິ້ມ.
ທີ່ມາ:http://vientianemai.net/khao/16074.html
ไม่มีความคิดเห็น:
แสดงความคิดเห็น